បារាំង៖ ដំណើរទស្សនកិច្ចក្រៅប្រទេសជាលើកដំបូងរបស់ព្រះមហាក្សត្រ ឆាលស៍ (King Charles) ទៅកាន់ប្រទេសបារាំង ក្នុងនាមជាព្រះមហាក្សត្រស្នងរាជ្យនៃចក្រភពអង់គ្លេស ត្រូវបានសម្រេចពន្យារពេលដោយសារតែភាពចលាចលនៃសង្គមបារាំងកំពុងមានការរីករាលដាលខ្លាំង។ គួរបញ្ជាក់ថា ដំណើរទស្សនកិច្ចនៃព្រះអង្គម្ចាស់ ឆាលស៍ ព្រះមហាក្សត្រនៃចក្រភពអង់គ្លេស ទោកាន់ប្រទេសបារាំងត្រូវបានគេសន្មត់ថាជាឱកាសប្រារព្ធជំពូកថ្មីនៃភាពសុខដុមក្នុងទំនាក់ទំនងរវាងទីក្រុងឡុងដ៍និងប៉ារីស។
ផ្ទុយទៅវិញ ដំណើរទស្សនកិច្ចដែលនឹងមានពិធីជប់លៀងនៅព្រះបរមរាជវាំងចាស់នៅតំបន់ Versailles និងដំណើរទស្សនកិច្ចទៅកាន់តំបន់ដាំដុះស្រា Bordeaux ដ៏ល្បីល្បាញ ត្រូវបានរាំងស្ទះដោយការតវ៉ាប្រឆាំងរដ្ឋាភិបាលក្នុងប្រទេសបារាំង ដែលបច្ចុប្បន្ននេះគេបានសង្កេតឃើញថាមានការតវ៉ារវាងហ្វូងបាតុករដែលបានដុតអគារមួយចំនួន ក៏ដូចជាការប៉ះទង្គិចជាមួយកងកម្លាំងសមត្ថកិច្ចផងដែរ។
ក៏ដូចជាការអាម៉ាស់មួយសម្រាប់ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) ការពន្យារពេលនេះគឺជាការខកព្រះទ័យមួយសម្រាប់ព្រះអង្គម្ចាស់ Charles ដែលព្រះអង្គបានទទួលយកនូវដំណើរទស្សនកិច្ចក្រៅប្រទេសជាលើកដំបូងបង្អស់របស់ទ្រង់ ចាប់តាំងពីការស្នងរាជ្យពីព្រះមាតាគឺម្ចាស់ក្សត្រី អេលីហ្សាប៊ែត កាលពីខែកញ្ញា។ ក្នុងដំណើរទស្សនកិច្ចផ្លូវរដ្ឋជាលើកដំបូងនៃរជ្ជកាលរបស់ទ្រង់ ព្រះអង្គម្ចាស់ ឆាលស៍ និងម្ចាស់ក្សត្រី ខាមីឡា គ្រោងនឹងយាងទៅកាន់ប្រទេសបារាំងដំបូងគេ មុននឹងយាងទៅអាល្លឺម៉ង់ដែលជាគោលដៅបន្ទាប់។
គួរបញ្ជាក់ថា ដំណើរទស្សនកិច្ចនេះត្រូវបានរៀបចំឡើងដើម្បីអបអរចំណងមិត្តភាពរបស់ចក្រភពអង់គ្លេសជាមួយមហាអំណាចអឺរ៉ុបទាំងពីរ បន្ទាប់ពីចក្រភពអង់គ្លេសបានសម្រេចចិត្តចាកចេញពីសហភាពអឺរ៉ុបកាលពីឆ្នាំ២០១៦ និងការចរចាដ៏តានតឹងដែលបានធ្វើឡើងបន្ទាប់ពីមានទំនាក់ទំនងការទូតមិនសូវជាល្អប្រសើរកន្លងមក៕
